MANGAYUBKON HABUJINGAN RAP HAPOSOAN

Dagdaganak nadua simanjujung nangkan langka  mamolus adat matobang naitogu togu anak boruna ima  tutapian raya bangunan nangkan mangayubkon haposoan dohot habujingan.. mangkulingma anak boru tobang tu dagdaganak on salaos mamangirna :

Mardalan ma da mardalan..
Asok asok ma da disimanjojakkon..
Pagayung tangan simangido..
Itata mada hamu nadua nadi togu togu on..
Tu lubuk sigedek gedeon
Parkatimbungan ni boru ni raja
Parkatimbungan no boru na mora
Namarpangir baya marpare pare on
Namarpangirkon unte mungkur
Namangayupkon da baya da haposoan
Mangayupkon da habujingan
Namangalap da parsaulian tu tapian raya bangunan
Salamat ma amu dipardalanan
So sumonang doma roha ni ama inantaon
Na mangokkop tondi dohot badan munuon
Sian menek lopus mangodang
Mardalan ma amu marasok asok
Tu tapian raya bangunan
Salamat ma nian dipardalanan

Dung lalu amu sian tapian raya bangunan
Dison ma dipatama satama tama ni pangalaho
Madung di ayubkon habujingan rap haposoan
Na diayubkon di tapian naso marlinta
Asa tapian naso marrongit
Onpe da amang dohot inang
Molo sada ditamba sada akkon bisa ma dapotna sada
Dipasada ma hamu nadua ulang be adong hata marsarak
Molo sada ditamba sada dapotna ima dua
Dia ma nasada ulang lupa tu Tuhan
Diama na dua ulang lupa marorangtua

Laklak muse nadiginjang pintu
Singkoru nadigolom golom
Maranak ma hamu nian najitu jitu
Asa marboru muse manian napohom pohom..

Horas...  Horas...  Horas...
Horas tondi madingin
Pir muse tondi matogu..
Sayur matua bulung..
Sahat mude tu hagabean..

by : Zulkhairi Pulungan